Lancewood het vrese besweer dat dit in ‘n finansiële krisis verkeer.
Mnr. Leon Conradie, ‘n raadgewer aan die suiwelmaatskappy, sê met Lancewood se huidige vervaardigingsvlakke, toepaslike voorraad op hande en ‘n skoon debiteureboek is dit “gereed om met oorgawe aan enige oplewing in die ekonomie deel te neem.”
Die maatskappy het sy melkprys aan produsente aan die begin van September met 20c/liter verlaag. Dit bring sy totale verlagings sedert Junie vanjaar op 80c/liter te staan.
Luidens ‘n omsendbrief wat die maatskappy op 18 Augustus aan produsente gestuur het, word dié jongste daling aan die voortdurende ooraanbod van roumelk (plaaslik en internasionaal), lae wêreldpryse, die sterk rand en gesubsidieerde invoere toegeskryf.
Leweringskwotas
“Lancewood skram steeds weg van die implementering van leweringskwotas en is dus verplig om by die geleentheid die roumelkprys met 20c/liter te verlaag met ingang 1 September 2010. Dit spyt ons om die prysverlagings op so ‘n kort kennisgewing te doen, maar dit word ongelukkig genoodsaak deur die huidige (hopelik) korttermyn onstabiliteit in markte,” lui die brief.
Sommige produsente sê hulle het prysverlagings van meer as R1,20/liter deur Lancewood beleef. Conradie sê dié ondervinding kan moontlik aan die invloed van melkpremies toegeskryf word.
Hy sê Lancewood betaal ‘n premie vir die hoër vastestofinhoud van gelewerde roumelk. “Met ander woorde, hoe laer die vastestofinhoud vanaf ‘n produsent, hoe laer die prys wat die produsent ontvang.”
Conradie meen die huidige onstabiliteit in die suiwelmark sal voortduur totdat ‘n balans bewerkstelling kan word. “Totdat daar groter balans tussen vraag en aanbod in die suiwelbedryf is, sal die huidige onstabiliteit voortduur. Maar, sodra daar egter ‘n guntige oplewing kom, sal ons dit onmiddelik aan ons produsente kommunikeer.”
11 September 2010
