Die salarisse van die direksielede van die Land Bank sal verlaag word om hul verdienste in pas te bring met ander staatsinstellings.
Dié tien nie-uitvoerende lede van die bank kry tans die hoogste vergoeding van alle staatsinstellings.
Dr. Ben Ngubane, voorsitter van die direksie, het aan die Parlement se Portefeuljekomitee van Finansies en die een van Landbou, Bosbou en Visserye, uitgewys dat hy reeds ’n brief van die Nasionale Tesourie gekry het dat die vergoeding van direksielede vir staatsinstellings gestandaardiseer sal word. Hierdie brief moet Ngubane nog aan sy direksielede voorlê.
Direksielede van die bank is meer vergoed om te verseker dat die regte mense gekry word om met sy omkeerstrategie te help. Die bank is nou stabiel en daarom hoef die lede nie meer as die didreksielede van ander instellings betaal te word nie, het Ngubane gesê.
Voordelig vir bank
Ngubane verdien sowat R800 000 per jaar as voorsitter, terwyl ander voorsitters sowat R500 000 verdien. Hy het gesê die vermindering van die salarisse van direksielede sal voordelig vir die bank wees, want minder geld sal op salarisse uitgee word.
Hy het ook aan die komitee gesê dat ander staatsinstellings by die bank moet leer hoe om weer ’n stabiele instelling te word. Die Land Bank het ’n ongekwalifiseerde, of skoon, oudit van die Ouditeur-generaal vir die 2010-’11-boekjaar gekry.
Die bank beoog om sy markaandeel in die huidige boekjaar met 30% te laat groei en met 50% binne vyf jaar.
18 Oktober 2011
