Mnr. Themba Rikhotso is met ingang 1 April as
die nuwe uitvoerende hoof van die Land Bank aangestel.
Me. Khensani Mukhari, wat vroeg verlede jaar as finansiële hoof van die bank aangestel is, het sedert Mei 2022 in die pos waargeneem nadat mnr. Ayanda Kanana ná twee jaar in die posisie bedank. Kort nadat Kanana in Maart 2020 die uitvoerende hoof geword het, het dit bekend geword dat die bank nie sy betalerverpligtinge kon nakom nie.
Die bank sê in ’n verklaring Rikhotso het ’n BCom-graad en ’n magister in bedryfsleiding (MBL). Hy het verder ’n internasionale uitvoerende ontwikkelingsprogram aan die GIBS-sakeskool van die Universiteit van Pretoria voltooi, asook ’n uitvoerende ontwikkelingsprogram aan die Wharton-skool van die Universiteit van Pennsylvania in Amerika.
Benewens sy ervaring in die finansiëledienste-sektor het hy uitgebreide uitvoerende bestuurservaring wat aan hom stewige vaardighede in die kleinhandel- en korporatiewe bankwese gee. Hy het verder ook ervaring in finansiering van landbouprojekte in Afrika.
Onder die leierskapsposisies wat hy beklee het, is uitvoerende hoof van verkope, transaksie- en beleggingsbankwese by die Standard Bank-groep en hoof van transaksiebankwese by CFC Stanbic Bank in Kenia.
Me. Thabi Nkosi, voorsitter van die direksie, het in Oktober verlede jaar gesê die bank het gehoop om teen einde verlede maand, die einde van sy boekjaar, ’n ooreenkoms met sy uitleners te bereik vir die herstrukturering van sy skuld.
Die bank het nog nie bekend gemaak of die ooreenkoms toe wel bereik is nie. Die datum is al verskeie kere uitgestel.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
