Die landbou in Suid-Afrika is in staat om tot 1 miljoen nuwe werkgeleenthede te skep – wat bykans 10% van die totale hoeveelheid werkgeleenthede in die land uitmaak.
Twee akademici, prof. Mohammad Karaan en prof. Nic Vink, albei van die Universiteit van Stellenbosch, het op Agri SA se konferensie in die Eikestad gesê die landbou het die vermoë om dié bykomende werkgeleenthede skep.
Karaan het gesê die landbou kan ‘n belangrike rol speel in die opheffing van landelike gebiede, asook bystand met die vestiging van mense in dié gebiede.
Dit is egter belangrik dat ongelykhede in landbou uitgewis word, het hy bygevoeg.
Bykomende werkgeleenthede
Prof. Nic Vink, voorsitter van die departement landbou-ekonomie aan die Universiteit Stellenbosch, sê dié bedryf kan 643 000 addisionele werkgeleenthede in die primêre sektor en 326 000 werkgeleenthede in die sekondêre sektor skep.
Die werkgeleenthede sal op drie maniere geskep word: Deur die uitbreiding van besproeiingspotensiaal, bevordering van kleinskaalse boere en deur sogenaamde wenbedrywe te identifiseer en uit te brei.
“Suid-Afrika produseer sowat ‘n derde van sy landbouproduksie op 1,5% van die landbougrond. Besproeiing sal ‘n baie sterk rol speel in werkskepping. Die Departement van Waterwese meen daar is heelwat addisionele besproeiingspotensiaal in die land. Ons kan van 1,5 miljoen ha onder besproeiing opgaan tot 2 miljoen ha,” sê Vink.
“Groot dele van Suid-Afrika se landbougrond is in die kommunale areas en ook nou toenemend in mislukte grondhervormingsprojekte waar die grond nie produktief gebruik word nie. Ons moet hierna kyk en sorg dat dit produktief word.
“Die derde strategie is om wenners te kies: Om bedrywe te vind wat goed vaar en die vooruitsigte het om ook in die toekoms goed te doen.”
21 Februarie 2012
