Die landbou moet sy kwessies op die hoogste vlak onderhandel, verkieslik op presidensiële vlak.
Só was dit toe mnre. Nelson Mandela en Thabo Mbeki president was, maar sedert 2009 vind sulke gesprekke nie meer plaas nie, sê mnr. Salam Abram, voormalige lid van die parlementêre portefeuljekomitee vir landbou, bosbou en visserye wat uit die ANC bedank het.
Abram het by die TLU SA se jaarkongres in Pretoria na 'n toespraak deur Mandela verwys waarin hy gesê het hoe belangrik die landbousektor is. Mandela het toe ook gesê regstellende maatreëls om grond te hervorm, is onontbeerlik, maar dit is net so belangrik om nie produksie te ontwrig of nuwe ongeregtighede te skep nie.
Abram sê deesdae maak mense laer af in die Regering, soos ministers, uiteenlopende uitsprake. Só het mnr. Gugile Nkwinti, Minister van Landelike Ontwikkeling en Grondhervorming, met die 50%-plan gekom waarna senior ANC-lede gesê het dit is nie partybeleid nie.
“Bontpratery is die norm in die ANC.” Volgens hom is die beraad waar op plafonne besluit is, gemanipuleer om die minister se doelwitte na te streef. “Ons het met sulke mense te make, hulle is nie baie eerlik nie.”
Die “dubbelpratery” laat belanghebbendes hul respek vir die Regering verloor. “Die indruk bestaan dat die Regering nie in goeder trou optree nie.”
Verder skep voorstelle, soos die 50%-plan en grondplafonne, onhaalbare verwagtinge by mense.
Abram het gesê wanneer die Regering onderhandel, wil hy dit met voorvereistes doen en self die agenda stel.
“Die Regering verstaan nie die kuns van onderhandeling in die ingewikkelde Suid-Afrikaanse verband nie. Die Regering neem aan dat hy noodwendig die instelling is met wie almal wil onderhandel. Hy wil geen politieke beloning vir onderhandelinge bied nie. Hy wil die onderhandelinge wen.”
Op 'n vraag uit die gehoor of onderhandeling met die Regering die moeite werd is, het Abram gesê as 'n mens ‘n klimaat kan skep waar jy as gelyke kan onderhandel, kan jy baie vermag.
Hy het kongresgangers verder aangemoedig om vennootskappe te vorm met mense wat graag die landbousektor wil betree en het gesê in die breë gemeenskap sal boere meer steun vind as by die Regering.
