Die georganiseerde landbou sal oor die volgende 10 tot 15 jaar sy stempel baie duidelik moet afdruk, sê mnr. Henk van Wyk, voorsitter van Agri Noord-Kaap.
In sy voorsittersrede op die organisasie se kongres het hy gesê hy voorspel dat die verandering oor dié tydperk groter sal wees as oor die afgelope drie eeue.
Hy het gesê landbouers het baie goed by die politieke bedeling aangepas, maar baie eise word steeds aan die bedryf gestel, onder meer om die emosie oor private grondbesit te begrawe en dat grond as ’n produksiefaktor in dieselfde lig as kapitaal gesien moet word.
“Dit is moontlik, maar dit sal ’n groot denkskuif verg, veral waar grond vyf geslagte of langer in familieverband besit word.”
Van Wyk het die landbou se beroep herhaal dat die Regering ’n beleidsomgewing moet vestig wat vertroue skep en aan die verwagtinge voldoen, en besef dat ekonomiese groei wat werkskepping tot gevolg het, die enigste voertuig is om welvaart te skep en ongelykhede te verklein.
Hy het ook ’n pleidooi gelewer dat die bedryf die ontwikkeling van nuwe boere ondersteun. “Dit is in ons belang om nuwe kommersiële boere te ontwikkel om ’n groter middelklas te vestig. Hulle moet ons produkte koop.”
