Die rol van die landbou in die gemeenskap is nie net om kos te produseer nie, maar die landbou moet die broeikas van lewenswaardes wees.
“Ons moet die gemeenskap laat verstaan dat hy sy waardes en spiritualiteit gaan verloor as hulle nie die landbou oppas nie,” het prof. Mohammad Karaan, dekaan van die fakulteit landbou aan die Universiteit Stellenbosch, op die kongres gesê.
“Ons bederf ons kinders en noem dit liefde. Hulle raak los van die natuur, na-apers en verloor só hul integriteit, ’n deel van hul karakter word vernietig, hulle verloor hul waardes en die gemeenskap gaan tot niet. Die oplossing lê in ware nasiebou, die opheffing van die polarisasie van gemeenskappe en voortgesette ongelykhede en die beveiliging van die land.
“Daarby moet die uittog van talent gekeer word. Vrywillige dienslewering en wedersydse vertroue moet ’n werklikheid word.”
Eenheid nodig
“In die landbou is eenheid nodig. As dit nie binne ’n jaar gebeur nie, gaan boere hulle aan die verkeerde kant van die gemeenskap bevind. Groei, ontwikkeling en billikheid is noodsaaklik, navorsing is nodig, want die land is 30 jaar agter en dit is tyd dat ’n groeistrategie daargestel word.
“Die landbou is by uitstek geskik om werkloosheid teen te werk. Kleinboere het ’n plek sodat mense na hulself kan omsien en hul kultuur in stand kan hou. Dit is die broeikas van die boere van môre.
“Die unieke uitdaging aan die landbou is om in die landelike gebiede in te gaan en te sorg dat die bevolking daar nie honger ly en ondervoed en arm is nie,” het hy gesê.
“As Suid-Afrika op sy huidige pad voortgaan, kan ons kinders verwag om ’n geplunderde planeet te erf met voedselkatastrofes, ’n wêreld sonder water waar sommige mense gaan feesvier en ander verhonger. Ons gaan ’n volk van getalle word waarin die sterkes sterker en swakkes swakker gaan word.”
21 September 2010
