Die bydrae van Suid-Afrika se primêre landbou tot die BBP word as ’n geringe 3% beskou, sê mnr. Kobie Venter van Standard Bank.
Venter het tydens die jaarlikse Levubu-boeredag gesê wanneer die primêre landbou en die sekondêre verwerking van landbouprodukte bymekaar getel word, is die landbou se bydrae tot die BBP eintlik tussen 20% en 30%. Vegelyk dit gerus met die bydrae tot die BBP van die mynbou se 21% en die 30% van die finansiële sektor.
Die landbou het die afgelope jaar sowat R45 miljard bygedra tot die land se invoerverdienste (BBP). Dit verteenwoordig ’n redelike groot gedeelte van die land se BBP. Die landbou is ook ’n groot werksverskaffer in die platteland wat sowat 10% van Suid-Afrika se werkersmag verteenwoordig. Voedselsekuriteit is een van die gonswoorde in die ekonomie omdat ekonomiese groei daarvan afhanklik is.
Wanopvattings bestaan oor presies wat voedselsekuriteit is. Baie mense beskou voedselsekuriteit bloot as die beskikbaarheid van voedsel en dat dit tot ’n tekort aan voedsel en tot negatiewe ekonomiese omstandighede in die land sal lei. Voedselsekuriteit strek egter verder en sluit ook in die toegang tot voedsel.
Voedsel kan ontoeganklik wees weens ’n gebrek aan infrastruktuur soos die openbare vervoerstelsel of omdat die verbruiker eenvoudig nie die geld het om voedsel mee te koop nie, het Venter gesê.
11 Oktober 2010
