Ná jare se klagtes van verval by die Landboukollege Potchefstroom sê ‘n gesondheid- en veiligheidsbeampte die toestande by die kollege is onaanvaarbaar, aldus AfriForum Jeug.
Die organisasie het verlede week die kampus saam met mnr. Franklin Jackson, ‘n onafhanklike ondersoekbeampte, besoek.
Die organisasie gaan luidens ‘n verklaring nou vra dat verdere ondersoek by die kollege ingestel word, wat ook moontlike finansiële wanbestuur aangaan. Hulle rig ook opnuut ‘n versoek aan die Noordwes departement van landbou, omgewingsake, landelike en omgewingsontwikkeling, om mnr. Dipepeneneng Serage, die kollegehoof, af te dank.
Die verslag
In sy verslag sê Jackson onder meer:
“Die hindernisse, onveilige toestande en risiko’s in die omgewing is totaal onaanvaarbaar. Die situasie sal egter onmiddellike aandag moet geniet aangesien die huidige toestande nie geduld mag word nie. Die onveilige elektriese bedrading kan ‘n brand- of skokgevaar inhou. Die onhigiëniese toestande in die koshuise dra by tot die gesondheidsrisiko’s. Die bestuur moet verantwoording doen vir die onaanvaarbare toestand van die kollege. Sou enige ongeluk of voorval gebeur weens die toestand van die kollege sal die bestuur volle verantwoordelikheid moet aanvaar.”
Klik hier vir die volledige verslag. Dit is in PDF-formaat.
Nasionale departement
Cameron sê ‘n deeglike ondersoek gaan nou volg en die kwessie sal ook met die Departement van Landbou, Bosbou en Visserye opgeneem word, aangesien mnr. Boitumelo Tshwene, die LUR vir die landbou in Noordwes, al vir ‘n geruime tyd van die toestande bewus is, maar niks word gedoen nie.
Landbou.com het self al op verskeie geleenthede die departement gevra vir reaksie op die swak toestande by die kollege, en foto’s is aan die departement verskaf, maar geen konkrete terugvoer is ontvang nie.
Lede van die publiek wat enige inligting oor die kollege het, kan Cameron by 073 388 0474 skakel.
15 Desember 2010
