Al is die landbousensus van 2007 ná amper vier jaar eers amptelik vrygestel, is die inligting wel nog bruikbaar, sê Agri SA.
Mnr. Dawie Maree, ‘n landbou-ekonoom, sê: “Dit is jammer dat dit so lank geduur het om die inligting uit te kry. Dit moes moontlik gewees het om met al die moderne tegnologie die verslag vinniger uit te kry. ”.
Die verslag is verlede week amptelik deur Statistieke SA vrygestel. Maree sê die inligting wat in die sensus vervat is, is egter wel steeds bruikbaar – hoewel die finansiële inligting sedert 2007 aansienlik verander het.
“Die vorige inligting waarop ons alles moes baseer was 2002 se sensus – dié inligting is darem net vier jaar oud, nie nege nie.”
Teen Maart op provinsiale vlak
Intussen sê mnr. Moses Mnyaka, ‘n woordvoerder vir Statistieke SA, die inligting behoort “as alles volgens plan verloop” teen die einde van Maart 2011 op provinsiale vlak aan almal beskikbaar gestel te kan word.
Die voorlopige resultate van die sensus is reeds in Februarie 2009 vrygestel, maar Mnyaka sê dit het so lank gevat om die amptelike dokument te voltooi aangesien dit baie deeglik saamgestel is.
“Die dokument gee baie deeglike inligting oor verskeie gewasse, vee en produksiesyfers tot op munisipale distriksvlak”.
Mnyaka sê nog ‘n uitdaging was dat vyf van die sewe senior statistiese wetenskaplikes wat oorspronklik aan die sensus gewerk het, die projek verlaat het en nuwe statutêre kundiges aangestel moes word.
Die sensus het sowat R30 miljoen, die bedrag wat aanvanklik daarvoor begroot is, gekos en is deur Statistieke SA en deur die Departement van Landbou, Bosbou en Visserye ondersteun. Sowat 150 werknemers het aan die dokument gewerk.
Die sensus
Die sensus bepaal dat Suid-Afrika in 2007 die totaal van 39 966 kommersiële plaaseenhede gehad het. Volgens Maree stem hulle saam met dié syfer. Hy sê hulle het wel nog nie ‘n skatting gedoen oor hoeveel kommersiële boere in die land is nie, hoewel hulle meen dat dit minder as dié getal is, aangesien een boer meer as een plaaseenheid kan besit.
Volgens die sensus het die sektor tussen 1 Maart 2006 en 28 Februarie 2007 sowat R2 832 miljoen se verliese gelei. Die meeste hiervan, R231 miljoen, was weens veediefstal.
Veldbrande het ook sy tol geëis met skade van R209 miljoen, terwyl roofdiere hulle pond vleis van R182 miljoen geëis het. Sowat R88 miljoen en R70 miljoen is ook onderskeidelik weens diefstal van gewasse en weens inbrake verloor.
18 Januarie 2011
