Boere kan hulle inkomste verhoog en die lewensvatbaarheid van hul bedrywighede verbeter as hulle meer geleenthede vir landboutoerisme skep, meen mnr. James Vos, die Demokratiese Alliansie (DA) se skaduminister van toerisme.
Tans werk een in elke 22 werkendes in die land in die toerismebedryf, wat 4,5% van die werkmag verteenwoordig. Plaaslike toerisme dra ook die meeste by tot totale toerismebesteding, met plaaslike reisigers wat R140,9 miljard tot die ekonomie in 2015 bygedra het.
Siende dat toerisme R3,10 van elke R100 uitmaak wat vir die land se ekonomie ingebring word, maak dit sin om hierdie sektor te verbind met die landbousektor, wat in 2015 slegs 2,4% tot die ekonomie bygedra het, meen Vos. “Deur die kombinasie van toerisme met die uniekheid en diversiteit van die plaaslike landbou, kan landboutoerisme die geleenthede vir plaaslike boere bied om hul inkomste verhoog en die lewensvatbaarheid van hul bedrywighede te verbeter.”
Die realiteit is ook dat die bedryf weens sy seisoenale aard nie altyd volgehoue werksgeleenthede vir plaaswerkers verseker nie, en hierdie situasie sal vererger word deur verhoogde ekonomiese druk op die landbou. Landboutoerisme kan dus help om buite seisoentye inkomste na die plaas te bring.
Dit bied ook voordele vir die breër plaasgemeenskap, terwyl dit ook die potensiaal het om binnelandse toerisme te bevorder, asook om besoekers met boere en hul produkte te skakel. Dit kan ook ’n uitstekende voertuig wees om die publiek meer oor die belangrikheid van die landbou en sy bydrae tot die land se ekonomie te leer.
Geleenthede
Suid-Afrika het verskeie landbou-bedrywighede soos veeboerdery, vrugte-, wyn-, suiwel, graan en rooibos. “Al hierdie bedrywe kan in toerismegeleenthede ontwikkel word waar toeriste die geleentheid gebied word om aan die daaglikse boerderybedrywighede deel te neem, asook die oes- en snoeiproses,” sê Vos.
Sommige plase het reeds begin om die landbou en toerisme saam te smelt deur nie net verblyf op hulle plase beskikbaar te maak nie, maar ook stap-, bergfiets- en perdryroetes aan te bied.
