Die voortbestaan van 13 landboutrusts, insluitend die Mielietrust, die Luserntrust, die Wintergraan- en Sorghumtrust en die een vir die wynbedryf, is in die weegskaal.
Me. Tina Joemat-Pettersson, Minister van Landbou, Bosbou en Visserye, het in die Parlement gesê die transformasie van dié trusts is een van die kwessies waaraan sy vanjaar by voorkeur aandag sal gee.
Volgens die Nasionale Landboubemarkingsraad se strategiese vyfjaarplan wat vanaf 2012 tot 2017 strek, is bates van R1 784 miljoen van die voormalige landbou-beheerrade na die trusts oorgedra.
'Hoe om trustgeld te bestee'
Hoewel die NLBR nie magte het om voor te skryf hoe trustgeld bestee mag word nie, meen dié instelling dat dit in belang van die trusts is om tot die transformasie van die landbousektor by te dra.
Joemat-Pettersson het aan die portefeuljekomitee vir landbou, bosbou en visserye gesê dat die trusts die bemarkings- en kredietrade van die verlede was wat wit boere gehelp het om op die been te kom.
Sy sê die trusts stipuleer dat slegs 20% van hul inkomste uit regeringsheffings aan swart boere moet gaan. “Ons sal nooit ons AgriSEB-mikpunte behaal as net 20% aan swart boere gegee word nie.” Een van die trusts het glo slegs R12 miljoen. Die geld van die trusts moet bymekaargegooi word, want meer kan gedoen word met die rente wat van ’n miljard gekry word, het Joemat-Pettersson gesê.
5 Maart 2012
