Landbouweekblad se suksesvolle droogteherstel-, veld- en bossiedae wat van 2017 af in die ekstensiewe weistreke van die Noord- en Wes-Kaap gehou is, word in Maart in die Oos-Kaap gehou.
Die meeste distrikte daar het tot dusver goeie reën gekry en die veld is besig om stadigaan te herstel. Soos met vorige droogteherstel-, veld- en bossiedae wil Landbouweekblad boere help om moed te hou waar dit nog droog is of help om hul herstelvermoë en veerkragtigheid ná die droogte te versterk.
Onderwerpe soos veldherstel, die bestuur van veld en weiding deur vee, die ekonomie van skaap- en bokhaarboerdery en die toekoms van droogtehulp sal bespreek word op Graaff-Reinet (18 Maart), Willowmore (22 Maart) en Steytlerville (23 Maart).
