Vir twee plaasmoorde is ‘n 27 jarige man lewenslange tronkstraf opgelê nadat hy skuldig bevind is aan die moord op ‘n boer en sy vrou van die plaas Wiltevrede in die Vierfontein-distrik in die Vrystaat.
Luidens ‘n verklaring is die 54 jarige mnr. Hendrik Visagie en sy 56 jarige vrou, Sophia, op 15 Desember 2009 vermoor. Visagie was ook ‘n mynwerker in die omgewing.
‘n Man, Martin Berkouk, het op 14 en 15 Desember 2009 by sy vriendin op dié plaas tuisgegaan. Hy is die oggend van die 15de Desember deur ‘n petroljoggie van Potchefstroom by die Polisie aangegee. Volgens die joggie het Berkouk met die Visagies se voertuig gery en was sy klere vol bloed, terwyl die voertuig se kattebak ook vol bloed was.
Liggame in die veld gevind
Berkouk is naby Fochville aangekeer waar die voertuig, juweliersware en die identiteitsdokumente van die Visagies in sy besit gevind is.
Mnr. Visagie se liggaam is in ‘n veld naby Orkney gevind, terwyl sy vrou se liggaam sowat 15 km buite Klerksdorp op die N12 gevind is.
Berkouk is Woensdag, 15 September, lewenslange tronkstraf opgelê. Hy is ‘n verdere 15 jaar tronkstraf opgelê vir huisroof en vier maande tronkstraf vir die onwettige besit van ammunisie.
Die Polisie het sy dank uitgespreek vir die hulp van die gemeenskap met die opspoor van die liggame en die vervolging van Berkouk.
15 September 2010
