Mnr. John Viedge (79), beesboer van Nqanqarhu, is in Mei 2021 in sy huis op die plaas Highlands vermoor.
“Ons verwelkom die vonnis en hoop dit dien as ’n afskrikmiddel vir toekomstige plaasaanvallers wat sulke misdrywe wil pleeg,” sê mnr. Coert Jordaan, Agri Oos-Kaap se voorsitter van landelike veiligheid. “Ons hoop dit stuur ’n ernstige boodskap na misdadigers dat howe dié tipe misdrywe in ’n ernstig lig beskou.”
Mnr. Jason Kümm, bestuurder vir landelike veiligheid by Agri Oos-Kaap, sê daar moet erken word dat ’n lewe verloor is en dat geen vonnis Viedge ooit sal terugbring nie.
“Ons hoofprioriteit moet wees om verdere barbaarse voorvalle soos dié te voorkom. Daarby gesê, Agri Oos-Kaap is tevrede met die vonnis wat opgelê is.
“Ons wil ook die polisie en die vervolgingsgesag loof vir die manier waarop hulle die saak hanteer het, wat gelei het tot ’n maksimum vonnisoplegging vir die beskuldigde.”
Die Suid-Afrikaanse Polisiediens het die vonnis verwelkom en skryf dit toe aan die goeie ondersoek deur adj.off. Julius Mani.
Mandlakazi is ook 15 jaar vir roof en 8 jaar vir huisbraak opgelê. Volgens kapt. Ursula Roelofse, polisiewoordvoerder, soek die polisie nog na die tweede verdagte in die saak.
Die polisie is op 30 Mei 2021 om ongeveer 04:30 in kennis gestel van die plaasaanval. Met hul aankoms is Viedge met ’n noodlottige skietwond aangetref.
Sy vrou het tydens die aanval onder die bed weggekruip.
Volgens die polisie het twee aanvallers toegang tot die huis verkry deur die veiligheidshek in die heining om die eiendom te knip waarna hulle ’n skuifdeur gebreek het om die huis binne te gaan.
Verskeie skote is op die egpaar afgevuur en Viedge is noodlottig gewond. Die verdagtes het egter met leë hande gevlug nadat hulle klaarblyklik gesteur is.
Een van die verdagtes is dieselfde dag nog deur Mani en adj.off. Mnqginya en hul spanne in hegtenis geneem, waarna die ondersoek aan Mani oorhandig is.
