Mense kan tot 29 November kommentaar op die groenskrif op grondhervorming lewer.
‘n Kennisgewing oor die groenskrif is vir ‘n tweede keer in die Staatskoerant gepubliseer nadat dit reeds 16 September daarin verskyn het.
Met die groenskrif poog die Regering om ‘n nuwe beleidsrigting vir grondhervorming in die land te bied en stel ook drie strukture voor om hierdie beleidsvoorstelle in te stel.
Die Regering se viervlakstelsel oor grondbesit dui aan dat staats- en openbare grond slegs onder huurbesit moet wees; daar ’n beperking op die besit van private grond moet wees; buitelandse eienaarskap van grond verbind moet wees aan sekere vereistes en voorwaardes; en kommunale grondbesit met sekere institusionele gebruiksregte. Die strukture wat hy wil instel is ‘n kommissie vir die bestuur van grond (LMC), ‘n grondwaardeerder-generaal en ‘n bestuursraad vir grondregte (LRMB).
Gehoop dit kan deurglip?
Me. Annette Steyn, DA-LP, sê dit is vreemd dat die dokument wéér gepubliseer is. “Het hulle dalk gehoop dit kan deurglip sonder dat mense sien dat daar nou ‘n datum vir die lewering van kommentaar is.
“Ek sal dophou of hulle moeite gaan doen om te adverteer dat kommentaar nou gelewer kan word.”
Die nasionale verwysingsgroep wat moet raadgee oor die groenskrif het reeds vergader. Mnr. Gugile Nkwinti, Minister van Landelike Ontwikkeling en Grondhervorming, het die groep op die been gebring.
Steyn wonder of hierdie nie ‘n stap is om mense te kry om in hierdie vergaderings kommentaar te lewer en nie by die openbare vergaderings nie. Sy meen die afsnydatum om kommentaar te lewer moet tot einde Februarie 2012 verleng word, veral omdat die kwessie oor kommunale grondbesit baie tyd sal neem.
“Die kommunale kwessie is in die groenskrif en mense moet nou al tyd kry om dit te bespreek,” sê Steyn.
Kommentaar op die dokument kan aan die Departement van Landelike Ontwikkeling en Grondhervorming se provinsiale kantore gestuur word.
7 Oktober 2011
