Ontledings die afgelope twee jaar in die omgewing van Vryburg, Ottosdal en Potchefstroom het getoon dat lewerslak by 75% van kuddes voorkom en dat tot 80% van die diere in die kuddes daarmee besmet is.
Dr. Martin Ferreira, ’n spesialisveearts in kuddegesondheid, het op die kongres van Noordwes se Rooivleisprodusente-organisasie (NWRPO) naby Hartbeesfontein gesê die verspreiding is lankal nie meer beperk tot “tradisionele” lewerslakgebiede nie. Hy sê gewone lewerslak het tradisioneel meer in die koeler, vogtiger oostelike deel van die land voorgekom.
Die reuselewerslak het gewoonlik weer in die warmer, droër westelike deel voorgekom.
Oral in die land
Dié spesies kom nou oral in die land voor en soms in dieselfde dier. Hy sê dit is meer wydverspreid as wat algemeen aanvaar is. “Ons moet ook aanvaar dat ons dit nooit sal kan uitroei nie. Ons sal net moet leer om ditte beheer.”
Volgens Ferreira sluit beheermaatreëls in die afkamping van stilstaande, oop water (soos vleie), die herstel van lekkende krippe, die bestryding van tussengashere (soos varswaterslakke), goeie biosekuriteit as nuwe diere die gebied ingebring word en geskikte chemiese bestryding.
Die besmetting lei veral tot lewerskade. Simptome sluit in vermaering, ’n kwakkeel (hangkeel), agteruitgang in kondisie, ’n kroes haarkleed, swak reproduksie, swak groei en gebrekkige immuniteit.
Die maklikste bestryding is ook nie noodwendig die doeltreffendste nie. Opgietmiddels is minder doeltreffend as inenting en inenting dalk minder doeltreffend as bekdosering.
28 Mei 2012
