‘n Man van Drummond in KwaZulu-Natal is Sondag (12 September) op sy kleinhoewe tussen Durban en Pietermaritzburg aangeval.
Luidens ‘n berig op Koerant.co.za is die man Sondagoggend aangeval, maar eers die middag gevind.
Mnr. Jeff Wicks, woordvoerder vir Netcare 911, sê die man is gevind nadat sy familie onraad vermoed het nadat hulle hom na talle oproepe nie in die hande kon kry nie. Hulle het Farmwatch gekontak, wat hom in sy motor-oprit gevind het.
Die man kon glo vir ure nie beweeg nie en het ernstige kopbeserings opgedoen. Hy is in ‘n ernstig dog stabiele toestand in ‘n plaaslike hospitaal.
Verdagtes van Noord-Kaapse plaasmoord aangekeer
Intussen sê mnr. Nicol Jansen, lid van Agri Oranje Karoo se aksiekomitee, twee verdagtes is Vrydag (10 September) aangekeer in verband met die moord van ‘n boer in die Noord-Kaap.
“Die een verdagte is in De Aar gevang, en die ander is op Hanover vasgetrek,” vertel Jansen.
Die 70 jarige mnr. Wartington is verlede Saterdagaand (4 September) oorlede nadat hy in sy enjinkamer na bewering deur twee mans oorval en met ‘n stuk gereedskap aangerand is. Sy vrou is ook aangeval en het ernstige kop- en gesigwonde en ‘n skedelbreuk opgedoen, asook een van haar arms is ook gebreek.
Volgens Jansen is die familie dankbaar dat die verdagtes so spoedig opgespoor is, en hoop hulle dat geregtigheid nou sal geskied.
13 September 2010
