Eskom gaan elektrisiteitsmeters op plase in die Mieliedriehoek bekyk nadat 'n man vasgetrek is wat glo met kragmeters peuter.
Alle elektrisiteitsmeters op plase in die Bothaville- en Viljoenskroon-distrikte gaan deur Eskom geoudit word om vas te stel of daarmee gepeuter is.
Dít kom nadat ’n mnr. Gerald Ferreira (44), ’n Eskom-subkontrakteur, op klagte van korrupsie, poging tot diefstal van elektrisiteit en bedrog in die landdroshof in Viljoenskroon verskyn het.
Meestal boere
Hy het glo oor meer as ’n jaar betalings van tussen R2 000 en R10 000 van meestal boere in die omgewing gehef om hul kragmeters te “kalibreer” sodat hul kragverbruik verminder, sê kapt. S’fiso Nyakane, woordvoerder van die Valke in die Vrystaat.
Nadat hulle ’n wenk gekry het, het Eskom die Valke se hulp ingeroep in ’n ondersoek wat uiteindelik amper 18 maande geduur het. Ferreira is op 26 Mei op heterdaad op ’n plaas by Viljoenskroon betrap, waar hy in besit van R7 800 was wat glo aan hom betaal is nadat hy ’n meter omlei het.
Boetefooi van R35 000
Eskom se Vrystaatse bedryfseenheid sê in ’n verklaring ’n boetefooi van tot R35 000 staar kliënte in die gesig met wie se meters wel gepeuter is. Hierby sal hul vir agterstallige verbruik, soos deur Eskom se ouditstelsels bereken, aangeslaan kan word, en moontlik vervolg kan word.
Enigeen wat na vore wil kom of inligting het wat met die ondersoek kan help, kan Eskom in kantoor-ure by (051) 404 2277 bel.
Vermoedelike elektrisiteitdiefstal kan ook anoniem teen ’n R1/SMS by 32211 aangemeld word.
