Ter illustrasie. Foto: Marieke Snyman
Ses Bonsmara-beeste is steeds soek nadat 35 verlede week op ’n plaas by Odendaalsrus in die Vrystaat gesteel is.
Die saak is op 6 Mei aangemeld. Lede van die Lejweleputswa-distriksmunisipaliteit se eenheid vir veediefstal en bedreigde spesies het die saak begin ondersoek. Hulle het spore vir verskeie kilometers gevolg tot by ’n mielieland waar hulle tien beeste gevind het.
Nog 19 beeste is 7 km van die plaas waar hulle gesteel is, gevind. Daar word steeds na die ander ses beeste gesoek. Die 29 beeste wat reeds gevind is, is aan hul eienaar terugbesorg.
Twee verdagtes is saam met die beeste aangetref. Een is in hegtenis geneem, terwyl die ander gevlug het. Daar word steeds na die tweede verdagte gesoek. Die verdagte wat in hegtenis geneem is, het gister in die Odendaalrus-landdroshof verskyn.
