Mnr. André Rheeder (47) van Polokwane het sy linkeroog verloor en sy arm is op twee plekke gebreek in 'n rooftog op die plaas Rondebosch van sy swaer, mnr. Henry Pretorius, naby Louis Trichardt. Rheeder se suster, mev. Estelle Pretorius, sê sy en haar gesin was met vakansie toe André na die plaas omgesien het.
Die rowers het voor Kersfees een nag op die plaas toegeslaan, by die huis ingebreek en Rheeder in 'n slaapkamer oorval waar hy geslaap het. Hy is aangerand en toe hy hom probeer verdedig het, is hy met 'n soort panga toegetakel en katswink geslaan.
Toe hy weer by sy sinne was, het die boewe sy arms by die elmboë agter sy rug vasgebind en hulle het hom in die huis rongelei, op soek na vuurwapens en geld. Geen ligte is aangeskakel nie en hulle het heeltyd selfoon-ligte in sy oë geskyn. Toe hy sy bakkie se sleutels aanbied, het hulle die kluis se sleutels daaraan gesien en hy is gedwing om hulle na die kluis te neem. Hy is op 'n stoel vasgebind en die aanvallers is daarna met drie vuurwapens en sy bakkie weg.
Rheeder sê hy het heeltyd hardop gebid: “In God se naam, moet my nie seermaak nie.”
Hy het baie bloed verloor en met sy mond van die ligte in die huis aangeskakel en om hulp geroep. Die plaaswerkers het hom te hulp gesnel en losgesny.
Die polisie is ingeroep en 'n ambulans het die erg beseerde Rheeder na die hospitaal op Louis Trichardt geneem. Weens die ernstige oogbesering is hy toe na die Mankweng-oogsorg-hospitaal in Polokwane oorgeplaas, waar sy oog verwyder moes word.
Rheeder sê ná goeie speurwerk onder leiding van kapt. Adam Sobyane van die SAPD op Louis Trichardt is die drie rowers nie lank daarna nie in Tembisa aangekeer. Die vuurwapens is almal teruggevind.
Rheeder het groot lof vir Sobayne, wat hom in die hospitaal besoek het en daagliks bel om hom op die hoogte te hou van die verloop van die saak. Die polisie verdink dié rowers ook van ander misdade in die omgewing van Louis Trichardt. Hulle het vroeër, op die dag van die aanval, op die plaas aangekom en wou lekkers aan die plaaswerkers verkoop. Een van die werkers se vroue is met draad aan 'n boom vasgebind, maar sy is nie beseer nie. Die rowers is tans in aanhouding.
