Suid-Afrika se Mangokwekersvereninging sê vanjaar se oes was oor die algemeen aansienlik beter as die oes van 2015/’16, waarvan 'n groot deel deur hael verpletter is en wat erg deur die droogte geknou is.
Nie net was die oes groter nie, maar die vrugte was vanjaar ook fisies groter as verlede jaar en om alles te kroon is minder siektes as vorige jare aangemeld. Die kwaliteit was dus beter met hoër uitpakpersentasies as vorige jare.
Met wisselvallige klimaatsomstandighede wat in groot dele van die land heers, was vroeë kultivars soos Tommy Atkins op party plekke vanjaar twee weke vroeër gereed om gepluk te word as ander jare. Met produsente in Malelane en Hoedspruit wat hierdie kultivar toe gelyktydig oes, was daar soms 'n ooraanbod van mango’s. Baie vrugte wat andersins op die winkelrak sou beland, moes na versappingsaanlegte gestuur word.
Internasionale kopers
Boonop het internasionale kopers afgeskaal op hul bestellings vir gedroogde mango’s uit Suid-Afrika, waarskynlik vanweë kompetisie uit Wes-Afrika-lande, soos Ghana en Burkina Faso.
Op plaaslike varsproduktemarkte verskuif vrugte nou egter fluks en mangokwekers verwag 'n toename in die vraag namate die seisoen vorder en ander kultvars beskikbaar raak. Die groenskil Kent en Keitt mango’s sal binnekort op die markvloer beskikbaar wees.
Saam met die bemarking van hierdie mango’s het die mangokwekersvereniging 'n veldtog van stapel gestuur om verbruikers bewus te maak van die verskillende gebruike van hierdie groter, soeter kultivars. Ander kultivars wat nou gepluk gaan word sluit in Shelley, Irwin, Haden en Heidi.
