Die stryd teen hidrouliese breking het ’n hupstoot gekry met Mark Ruffalo, ’n Amerikaanse akteur, wat nou in die Treasure the Karoo-aksiegroep (TKAG) se direksie dien.
Luidens ’n berig op Sake24.com het mnr. Jonathan Deal, voorsitter, dié verwikkelinge Donderdagaand (16 Februarie 2012) in Kaapstad bekend gemaak.
Ruffalo is die stigter van die Amerikaanse nie-regeringsorganisasie Water Defence, en Deal sal voortaan ook op die direksie van dié groep dien. Die groep koördineer veldtogte in Amerika teen hidrouliese breking, mynbou op bergspitse, sandolie-ontginning en ander vernietigende praktyke wat waterbronne bedreig.
Die akteur het in ‘n verklaring gesê die mynmetode is ‘n internasionale bedreiging wat wêreldwye reaksie verg. “’n Jaar gelede kon Suid-Afrikaners hul regering oor die risiko’s van hidrouliese breking waarsku weens dít wat in Amerika aan die gebeur is.
"Ons gaan met die TKAG saamwerk met onder meer geldinsameling. Omgewingsgroepe kom teen internasionale maatskappye te staan wat bykans onbeperkte begrotings het om hul korporatiewe agenda te dryf.”
Departement
Deal sê die TKAG het intussen ná ’n uitgerekte hofstryd dokumente van me. Susan Shabangu, Minister van Minerale Hulpbronne, ontvang wat die samestelling aandui van die taakspan wat die hidrobreking in Suid-Afrika moet ondersoek.
Dit is uit die dokumente duidelik dat die taakspan teen Augustus verlede jaar nog baie onseker was oor sy werk.
Amptenare van die Departement van Wetenskap en Tegnologie was glo nie seker wie in die taakspan dien en wie vir die saamstel van die verslag verantwoordelik is nie. Die taakspan het glo vyf maande om sy verslag op te stel, waar ’n soortgelyke taakspan in Amerika vier jaar vir ’n omvattende ondersoek gegun is.
Die Regering se moratorium op die toekenning van lisensies vir skalieprospektering verstryk glo einde vandeesmaand, nadat dit reeds een keer verleng is.
Bron: Sake24.com
17 Februarie 2012
