Die jaarlikse groei van plase se netto inkomste oor die volgende vier jaar behoort 2,8% te wees, sê me. Tina Joemat-Pettersson, Minister van Landbou, Bosbou en Visserye.
Dit is met die veronderstelling dat die herstel in kommoditeitspryse deur die relatief sterk rand gedemp sal word. Dit sal ook afhang van die tyd wat dit sal duur voor ekonomiese groei ’n impak op die kommoditeitsmarkte sal hê.
Me. Deidre Carter, Cope-LP, wou in ’n parlementêre vraag weet watter stappe die departement doen om te verseker dat die sektor groei. Joemat-Pettersson het geantwoord dat die departement ’n holistiese benadering het om ’n sterk grondslag vir beter mededinging in die sektor te bewerkstellig.
Sy sê belangrike elemente van dié benadering is die verwerking van landbouprodukte, logistiek in die sektor, meganisasie, infrastruktuur en navorsing en ontwikkeling.
In die volgende drie jaar is die departement se voorrangsake die bevordering van ekonomiese groei, die skep van werk en volhoubare lewensbestaan, die oprigting van ekonomiese en maatskaplike infrastruktuur, die verbetering van vaardighede en menslike hulpbronne, voedselsekerheid en die bevordering van internasionale samewerking.
13 Oktober 2010
