Die TLU SA eis dat Polisie-saaknommers teen boere wat glo op arbeidsinspekteurs skiet, deur die Minister van Arbeid verskaf word ná sy bewerings in dié verband.
In ‘n nuusverklaring sê die TLU SA dat die Minister van Arbeid, mnr. Membathisi Mdladlana, beweer dat boere op sy arbeidsinspekteurs skiet, of dat hulle aangerand sou word deur “boere”.
Die TLU SA daag nou die minister uit om nie met vaaghede vorendag te kom nie, maar die datum, tyd en plek te noem waar hierdie voorvalle plaasgevind het. “Dit is uiters agterdogtig dat gevalle voorkom waar boere op arbeidsinspekteurs sou skiet en die Polisie nie in groot getalle kort daarna op die plaas opdaag om 'n arrestasie uit te voer nie,” sê mnr. Ben Marais, die TLU SA se voorsitter.
Daarom eis TLU SA dat die saaknommers van klagtes wat by polisiekantore waar hierdie sake aangemeld was, bekend gemaak word.
Siek en sat vir vae beskuldigings
“Soos die Minister sê dat hy ‘siek en sat is vir konferensies’ wat geen vrugte afwerp nie, is die TLU SA siek en sat vir vae beskuldigings en veralgemenings teenoor boere. As die minister se arbeidsinspekteurs koeëlvaste baadjies wil hê, is dit waarskynlik omdat hulle bedreig voel deur die toename in rooftogte en kapings waaraan niemand ontkom nie,” sê Marais.
“Boere is net so siek en sat daarvoor dat mense hulle plase onregmatig betree, vee en werktuie steel of selfs mense op plase aanval. Daar is egter op ’n protokol ooreengekom waarvolgens enige persoon wat ’n plaas wil besoek, die regte prosedure moet volg om ’n plaas te besoek. Waar daardie protokol gevolg word, sal misverstande verhoed word en wedersydse respek en samewerking die gevolg wees,” sê Marais.
“Met ongestaafde uitsprake soos hierdie, lewer die minister geen bydrae om die gesindheid van boere teenoor amptenare te verbeter nie en bevorder hy veel eerder rassisme in 'n nuwe gewaad.”
29 September 2010
