Altesaam 164 plase in die Vrystaat wat as deel van grondhervorming deur die Regering gekoop is, lê nou onproduktief, sê mnr. Gugile Nkwinti, Minister van Landelike Ontwikkeling en Grondhervorming.
Hy het op ‘n parlementêre vraag gereageer van mnr. Darryl Worth, die Demokratiese Alliansie (DA)-lid van die nasionale raad van provinsies, rakende hervorming en die toestand van plase wat deur die Regering aangeskaf is vir dié doel.
Wat was die vraag?
Worth se vraag was tweedelig. Eerstens wou hy weet of enige van die plase wat die Regering sedert 1994 as deel van die grondhervormingsprogram in die Vrystaat nou verlate en/of onproduktief is. Indien daar wel sulke plase is, wou Worth weet hoeveel plase ter sprake is, waar die plase geleë is en wat aan die saak gedoen word.
Tweedens wou Worth vasstel of daar enige aksie geneem word om dié plase te rehabiliteer.
Die antwoord
Nkwinti het bevestig dat 20 van dié plase verlate is en dat 144 onproduktief is.
Hy sê sy departement se nuwe herkapitalisasie en ontwikkelingsprogram het reeds met ‘n veldtog begin om geldelike hulp, tegniese ondersteuning en die nodige opleiding te verskaf aand die begunstigdes van hervorming op die betrokke grond.
Ondersoeke rakende elke plaas is ook van stapel gestuur en kerndienste wat al gelewer word is die oprigting van groentetonnels, installasie van elektrisiteit, die aankoop van lewende hawe en die ontwikkeling van vaardighede.
Alle plase wat sedert 1994 deur die staat aangekoop is vir die doel van hervorming, kwalifiseer vir herkapitalisasie.
In die Kroonstad-omgewing is 20 plase onproduktief terwyl 16 plase die Ventersdorp-omgewing verval het.
Klik op die skakel hieronder vir die volledige lys van plase, waar die plase is en wat die redes vir elke stuk grond se verval is. Dit is in PDF-formaat.
7 Oktober 2010
