Die Nasionale Oesskattingkomitee voorspel in sy tweede raming van wintergewas-produksie dat dié oes 147 250 ton kan beloop. Dit sal die grootste ooit en 7 750 ton meer as die eerste oesskatting van ’n maand gelede wees.
Die komitee het ook sy hektare-skatting van kanola-aanplantings verhoog, met 5 000 ha tot ’n totale 95 000 ha, teen ’n verwagte opbrengs van 1,55 ton per ha. Dié aanplantings is meer as dubbel twee jaar gelede se 44 000 ha, en ’n derde meer as verlede jaar se 72 165 ha.
Daar is nietemin nog heelwat ruimte vir kanola-uitbreiding as na die totale invoer van olie en oliekoek gekyk word, sê mnr. Kellie Becker, besturende direkteur van die Swellendamse kanola-aanleg SOILL. Volgens Graan SA se jongste ramings kan soja-invoere vanjaar tussen 100 000 en 200 000 ton beloop, en sonneblom-invoere sowat 30 200 ton.
Wat koring betref, lyk dit of Vrystaatse boere toe uiteindelik ’n bietjie meer geplant het as aanvanklik geskat. Die komitee het sy raming van Vrystaatse koring-hektare vanaf verlede maand se 60 000 ha tot 69 500 ha opgeskuif. Dit laat egter steeds die Vrystaat, tradisioneel die land se naasgrootste koringprodusent, met ’n verwagte oes van 274 525 ton in die derde plek ná die Wes-Kaap (met ’n verwagte 914 500 ton) en die Noord-Kaapse besproeiinggebiede (met ’n verwagte 285 000 ton).
Die totale verwagte nasionale koringoes is 1,791 miljoen ton, teen ’n gemiddelde opbrengs van 3,76 ton per ha, en steeds minder as verlede jaar se 1,87 miljoen ton. Dit skiet ook ver te kort om in die nasionale behoefte van rondom 3,4 miljoen ton te voorsien.
