Hoewel koringboere versigtig optimisties is oor die koring wat tans op die lande staan, word verwag dat 1,4 miljoen ton van dié graan ingevoer gaan moet word, sê mnr. Andries Theron, ondervoorsitter van Graan SA.
“Ons verwag dat die meeste koring nóg vir die seisoen ingevoer gaan moet word.”
Theron meen dat die land se koring-invoer met dié oes en in die toekoms al hoe nader aan 50% van die totale verbruik gaan beweeg.
Droogte het groot invloed
Theron sê met die stroop van die oes wat al oor drie weke kan begin, het droogtetoestande oor groot dele van die land ‘n invloed op die oes.
“Ons in die Swartland is versigtig optimisties en van die boere se aanplantings lyk baie goed. Daar is wel boere wat weens die droogte reeds oesskade aangeteken het. Ons kort reën vir ‘n goeie oes.”
Volgens Theron heers groot kommer oor die gebrek aan reën in die Suid-Kaap. “Van Swellendam se kant af Kaap toe soek die boere baie reën vir die oes, en vir party is dit reeds te laat om ‘n beter oes te verseker.”
Ander dele raak droog
Ander dele in veral die sentrale streke van die land raak ook droër, en Theron sê dit lei ook tot ‘n mate van kommer. “Die boere naby Hoopstad, Reitz en Bethlehem se oeste lyk mooi, maar hulle het ook reën nodig vir hulle oeste om volle potensiaal te bereik.”
1 Oktober 2010
