Die Skolemelkprogram teiken veral voorheen benadeelde- en plaasskole om hulle van die verhouding tussen landbou en die verbruiker te vertel, sê mnr. Bertus Theron.
Theron, ‘n melkboer en voormalige bestuurslid van die Melkprodusente-organisasie, het as deel van Nasionale Melkdag ‘n skool in Wamakersvlei asook Paulus Joubert Primêr in die Paarl besoek om hulle oor melk in te lig.
Theron het die kinders ingelig oor hoe melk van koeie tot winkelrakke gaan en hulle ook aanmoedig om melkprodukte in die vervolg te respekteer. Theron het veral die nekke laat rek en die kinders opgewonde gekry toe hy hulle met ‘n massiewe Holstein-koei verras het.
Hy het toe verduidelik hoe melk vanaf die koei na die winkelrakke beweeg. “Kinders weet nie meer waarvandaan melk kom nie. As jy hulle vra, sê hulle van die winkel af,” het hy gesê. Volgens me. Barbara Bieldt, van die MPO, gaan dit nie net oor die voedingswaarde van melk en voordele wat dit vir kinders inhou nie, maar dit is ook belangrik om die bedryf te groei.
Paulus Joubert Primêr-leerders is gretig om van mnr. Bertus Theron se vrae te beantwoord. Foto: LEENSIE STREICHER
Na aanduiding hoe hy met vrae oorrompel was na die sessie, was dit duidelik dat kinders dié soort inligtingsessies geniet en interressant vind.
14 Oktober 2010
