Die JSE het pas ’n termynkontrak vir Merinowol bekendgestel, kort op die hakke van ’n kontrak vir lamkarkasse, wat die pryse van A2- en A3-grade lam navolg.
Die nuwe wolkontrak se pryse sal deur die Merino-aanwyser bepaal word, ’n indeks wat die bedryfsorganisasie Cape Wools SA ontwikkel het, sê die JSE in ’n verklaring.
Hierdie indeks is ’n aanduiding van bewegings in die wolprys, en word bereken deur ’n geweegde gemiddelde prys van ’n spesifieke wolveiling met dié van ’n vorige veiling te vergelyk. Dié veilings word in die wolproduksie-seisoen weekliks in Port Elizabeth gehou.
Buitengewone groeifaseMnr. Chris Sturgess, direkteur: afgeleide kommoditeite op die JSE, sê Cape Wools het die beurs aanvanklik oor die moontlikheid van ’n wol-termynkontrak genader. “Die plaaslike wolbedryf staan op die rand van ’n buitengewone groeifase, en die JSE is bevoorreg om die geleentheid te hê om die bedryf te help om sy potensiaal te verwesenlik.”
Mnr. Louis de Beer, Cape Wools se uitvoerende hoof, sê die vraag na wol is op die oomblik uitstekend omdat internasionale wolproduksie op ’n geskiedkundige laagtepunt is. “Die bedryf is uiters positief oor die heersende geleentheid om wolproduksie te verhoog. Die nuwe kontrak sal boere ’n meganisme bied om hul prysrisiko te verlaag.”
Hy sê Suid-Afrika het vanjaar 52,5 miljoen kg wol geproduseer, maar daar is markruimte om dit met nog 22,5 miljoen kg op te stoot.
Kopers en verwerkers ookAnder markspelers, soos kopers en verwerkers, sal ook by die nuwe kontrak baat kan vind, sê De Beer.
Hy meen die termynkontrak kan mark-spelers selfs help om bykomende finansiering te bekom, deurdat dit as sekuriteit kan dien.
Hy wys daarop dat daaglikse bewegings in die wolprys deur verskeie faktore beïnvloed word. Dit sluit in die wisselkoers, die vraag na wol uit Australië en Suid-Afrika, bestellings vanaf verskillende kopers, en die gehalte van wol wat aangebied word.
Lewering van wolHierby is die patroon van die lewering van wol siklies, met wol van verskillende gehalte en in verskillende hoeveelhede wat op verskillende tye deur die seisoen te koop aangebied word, wat die prys verder wisselvallig maak.
Bykans al Suid-Afrika se wol word teen rondom R4,5 miljard per jaar uitgevoer. Dit word deur tussen 4500 en 9000 kommersiële wolboere, en tussen 30 000 en 50 000 kommunale boere geproduseer.
Die nuwe termynkontrak verteenwoordig 1000 kg skoon, geweegde wol, en is vir vier verskansingsmaande – Maart, Junie, September en Desember – beskikbaar.
Byskrif: Op die bekendstelling van die Johannesburgse beurs se nuwe Merinowol-termynkontrak was van links mnre. Louis de Beer, uitvoerende hoof van die bedryfsorganisasie Cape Wools, Chris Sturgess, die JSE se direkteur: afgeleide kommoditeite, en Raphael Karuaihe, bestuurder: kommoditeite by die JSE. Foto verskaf
