’n Gemiddelde mielie-oes is nog net moontlik as wydverspreide reën in die volgende 10 dae sou val, meen Graan SA, maar in hierdie stadium is die weervoorspelling nie gunstig nie.
Die heersende hitte en uiterste droë toestande is presies die teenoorgestelde van wat die mielies nou, in die bestuiwingfase, nodig het.
Mnr. Jannie de Villiers, Graan SA se uitvoerende hoof, en sy hoofbestuurslede, wat graanboere van oor die land verteenwoordig, vrees dat ’n ondergemiddelde oes, as dit nie binne die volgende 10 dae reën nie, tragiese omstandighede in graanboerdery-gemeenskappe en die landelike ekonomie tot gevolg sal hê. Voorts sal dit vir ten minste die volgende 12 maande tot hoë voedselpryse lei.
Mieliepryse het reeds die laaste twee weke die hoogte in begin skiet.
“Goeie reën in die volgende 10 dae kan die (afwaartse) rigting waarin die oes beweeg moontlik verander, maar op die oomblik lyk dit nie goed nie,” sê De Villiers in die verklaring.
Hy wys daarop dat Suid-Afrika in die vroeë jare negentig laas ’n algemene droogte gehad het.
Graan SA se hoofbestuur, 35 produsente uit elk van die land se graanproduserende gebiede, het Donderdag in Pretoria vergader. Dié boere het verslag gedoen oor die stand van die huidige oes. In veral die Noordwes-Vrystaat en Noordwes is oesskade reeds sigbaar. In Mpumalanga en die Oos-Vrystaat lyk gewasse nog in die algemeen goed, maar het dringend opvolgreën nodig.
Mielies onder besproeiing is meestal geel, en verteenwoordig amper 20% van die totale oes, maar ook hierdie gewasse trek swaar weens al die beurtkrag wat nou toegepas word.
Nuwe-seisoen-witmieliepryse het reeds die afgelope 10 dae met R357 per ton, ’n volle 17,5%, gestyg. “As ons vanjaar ’n misoes het, kan pryse verder met tot bykans 30% verhoog. Mieliemeel is Suid-Afrika se stapelvoedsel, veral vir arm mense, en vorm die basis vir verwerkte produkte, soos pluimvee-, vleis- en suiwelprodukte,” sê De Villiers.
