Graan SA se aansoek om kwytskelding rakende die verhandeling van die surplus mielies in die land, is afgekeur, aldus die Mededingingskommissie.
Dr. Kobus Laubscher, uitvoerende hoof van Graan SA, sê nadat die ondersoek vir ‘n uitvoerpoel vroeër afgekeur is, is aansoek gedoen vir kwytskelding rakende onderhandelinge met die mark vir die moontlike inkoop in die oes.
“Ons is teleurgesteld dat die kwyskelding nie toegestaan is nie en omdat die proses só lank geduur het,” aldus Laubscher.
Volgens Laubscher sou hulle met dié kwytskelding die mark nader om op ‘n vrywillige basis in die surplus in te koop en om vir hoër pryse vir produsente te onderhandel. “Dit sou egter tot hoër pryse vir verbruikers lei. Ons argument was wel dat die lae pryse aan produsente nie vinnig aan verbuikers deurgegee word nie, dus sou die verhoging verbuikers nie so regstreeks geraak het nie.”
Die redes:
Die kommissie sê die aansoek is verwerp, want:
Dit sou plaaslike pryse van mieliemeel en insetkoste, soos voer, kunsmatig hoog hou.
Dit sou nie ‘n werkbare meganisme vir die bevordering van uitvoer wees nie.
Dit stem nie ooreen met die vereistes van die Mededingingswet vir ‘n sektor wat deur die Minister van Ekonomiese Ontwikkeling uitgewys is nie.
Die kommissie meen dat ander meer mededingende opsies vir ‘n mieliesurplus nie na behore verken is nie. Dié opsies sluit in die vervanging van gewasse, die produksie van bio-brandstof, produkte vir waardetoevoeging, die gebruik van die futures-mark, opberging vir toekomstige gebruik en mark-toetrede deur uitvoer-handelaars.
Kwessies na hoër vlak geneem
Volgens Laubsher is GSA wel bly oor die feit dat die onderhandelinge en debatte rondom die aansoeke die kwessies van produsente in die graanbedryf na ‘n hoër vlak geneem het.
“Die Nasionale Landboubemarkingsraad het in die proses ook ‘n Artikel 7-komitee saamgeroep. In daardie gesprekke is daar nie net gekyk na die aansoek nie, maar ook na die aanbod van veral mielies in die land. Ons weet dat die land in die toekoms al hoe meer surplusse gaan hê, en die stimulering van vraag het baie tydens dié besprekings na vore gekom – wat toekomstige voordele gaan inhou,” verduidelik Laubscher.
“Ons kernfokus vir 2011, ná die proses in 2010, is om vlugvoetigheid binne die Regering en die beleidsomgewing te probeer stimuleer en te bevorder.”
11 Januarie 2011
