Te midde van strooptyd het mieliediefstal reeds by agt dorpe in die Vrystaat voorgekom. Aangesien mielies nou ryp is, is hulle gesog onder misdadigers, sê mnr. Jakkals le Roux, voorsitter van Vrystaat Landbou se landelike veiligheidskomitee.
Mieliediefstal het reeds by Allanridge, Bothaville, Bultfontein, Koppies, Odendaalsrus, Vierfontein, Virginia en Welkom voorgekom. Verdagtes is op Allanridge, Bultfontein en Virginia in hegtenis geneem.
Volgens Le Roux werk die mieliediewe in groepe van tot 20. Hulle is met pangas en messe gewapen. Die gesteelde mielies word in sakke op bakkies geplaas en dan na afsetpunte vervoer om verkoop te word.
Mieliediefstal lei tot enorme finansiële verliese vir boere. Dit hou ook ’n veiligheidsrisiko in vir boere, hul werkers en sekerheidswagte wat die landerye moet beskerm.
“Mieliediefstal, soos wat dit in die Vrystaat voorkom, is ’n hoogs georganiseerde misdaad wat deur sindikate bedryf word. Dit is nie honger mense wat ’n paar mielies vanaf landerye onregmatig neem nie. Afsetgebiede, markte en geld wat van hande verwissel, is hier ter sprake.”
Dr. Jane Buys, veiligheidsrisiko-analis by Vrystaat Landbou, sê van die boere in die betrokke gebiede betaal tot R100 000 per maand vir sekerheidswagte om hul mielielande op te pas en te probeer beskerm teen die misdadigers.
Sy meen dié addisionele veiligheidsuitgawes, tesame met verhoogde insetkoste, kan voedselsekerheid beslis in die wiele ry.
Vrystaat Landbou het ’n dringende versoek tot die polisie gerig om mieliediefstal met die nodige erns in die Vrystaat te bejeën. Die polisie is versoek om op grondvlak hul misdaadvoorkomingsaksies met dié van boerderygemeenskappe te belyn ten einde mieliediefstal te bekamp.
Boere word ook versoek om voorvalle van mieliediefstal so vinnig moontlik by die polisie aan te meld.
