Die mielieprys kan binne ’n jaar tot R3 000 per ton styg.
Verskeie faktore sal só ’n hoë prys vir Suid-Afrikaanse saaiboere moontlik maak, sê mnr. Willem Engelbrecht, hoofbestuurder van Pioneer Hi-Bred in Suid-Afrika.
Hy het op ’n besoek deur agente en boere aan Pioneer se saadverwerkingsaanleg in Rosslyn, Pretoria, gesê hy baseer sy voorspelling deels op die Oesskattingskomitee se té hoë skatting van die huidige mielie-oes. Ondanks ’n verlaging van die komitee se raming sê hy die oes gaan 11,3 miljoen ton beloop. Die komitee het sy vorige skatting met slegs 3,4% verlaag.
Engelbrecht sê oeste is swak weens die droogte wat boere oor ’n wye front geteister het. Hy voorspel die oes gaan 9,5 miljoen tot 10 miljoen ton wees, wat sal meehelp dat die mielieprys teen Maart volgende jaar R3 000 per ton kan wees.
Skatting van mielie-oes
Talle kenners is, soos Engelbrecht, skepties oor die komitee se jongste raming van die mielie-oes. Die aanvanklike beraming was 11,7 miljoen ton, wat impliseer dat die droogte se ongunstige uitwerking maar min gaan wees.
Engelbrecht sê talle boere gaan net sowat 2 ton mielies per hektaar oes – sommige boere selfs minder. Heelwat boere het hierdie somer ook minder mielies en meer sojabone geplant, wat die Oesskattingskomitee se beraming “nog meer onlogies maak”.
Die mielieprentjie kan selfs verder verander as Amerikaanse boere, wat vanjaar die meeste hektare in 75 jaar wil plant, ook ’n droogte kry. Dán kan die prys meer as R3 000/ton bedra. Boonop is die mielie-oeste in Brasilië en Argentinië vanjaar swakker as verwag.
Engelbrecht sê toe hy twee jaar gelede ’n mielieprys van R2 000/ ton voorspel het, het mense hom nie geglo nie. Die prys het egter kort voor lank deur die kerf van R2 000/ton geskiet en by R2 800/ ton gaan draai.
19 April2012
