Wisselkoers:Die wisselkoers het die afgelope week met 17 sent verswak. Die groot nuus in terme van die rand is dat die meer gematigde, relatief pro-Europese Unie, mnr. Emmanuel Macron die nuwe president van Frankryk is. Dit veroorsaak dat die Amerikaanse dollar verswak teenoor ander geldeenhede, soos die rand. Die verdere verswakking van die rand is hierdeur gestuit, hoewel dit net tydelik van aard mag wees.
Ontleders is verdeeld oor die rigting van die rand/dollar-wisselkoers vir die komende tyd. Die gewilde siening by ‘n swakker rand as gevolg van die plaaslike politieke onstabiliteit, maar fundamentele en ander faktore kan die Rand laat versterk, byvoorbeeld ‘n ongewilde uitspraak deur pres. Trump.
Verhandeling vir die volgende week behoort sywaarts tot gunstig vir ‘n sterker rand te wees.
Amerikaanse mielieprys:Die VSA-mielieprys vir Julie 2017, soos wat dit op die CME beurs verhandel het, het met 8 Amerikaanse sent per skepel gedaal. Die tempo waarteen mielies in die VSA aangeplant word, word weekliks met dieselfde tyd die vorige jaar, asook ‘n vyf jaar gemiddeld, vergelyk. Volgens hierdie maatstaf is daar nie probleme met aanplantings nie, gevolglik het die internasionale (VSA) mielieprys effens gedaal. Prysbewegings vir die volgende weke sal byna uitsluitlik deur die aanplantings tempo bepaal word.
Verhandeling vir die komende week behoort sywaarts te wees.
Wit en geel mielies:Julie 2017 JSE se wit mielies het vir die week onder bespreking met R40 per ton gedaal, geel mielies vir dieselfde maand het met R25 per ton gedaal. Mieliepryse het die afgelope week nie saam met die wisselkoers beweeg nie, in teenstelling met die voorafgaande weke.
Ontleders is van mening dat pryse tot dusver nie genoeg geleenthede gebied het om substansiële uitvoere te verseker nie. Uitvoerskattings vir die jaar is rondom 2 miljoen ton. Prysvlakke sal heelwat moet daal (relatief tot uitvoerpariteitsvlakke) voordat genoeg mielies vir uitvoer gekontrakteer kan word.
Wit- en geelmieliepryse se verhandeling vir die komende week behoort sywaarts tot effens afwaarts te wees.
'n Grafiek van Julie 2017 mielies se beweging vir die afgelope week kan hieronder gesien word.
* Geskryf deur Johann Strauss, navorser by BVG Commodities
