Lae mielievlakke in sy silo’s en ’n swak vertoning van sy pluimvee-afdeling het Afgri se tussentydse resultate vir die huidige boekjaar benadeel.
Die genoteerde maatskappy het Woensdag (29 Februarie 2012) sy finansiële resultate vir die halfjaar geëindig op 31 Desember 2010 by die Radisson Blu-hotel in Sandton bekend gemaak.
Die maatskappy se omset het met 24,8% gestyg tot R4,579 miljard (2010: R3,669 miljard). Die wins vir die tydperk het egter 8,8% laer op R134 miljoen (2010: R147 miljoen) geëindig.
Die verdienste per aandeel het met 17% gedaal tot 36,9 sent per aandeel (2010: 44,6 sent per aandeel).Op ’n gunstige noot het die maatskappy sy skuldlas aansienlik ligter gemaak met die verkoop van sy skuldboek aan die Land Bank.
Afgri se skuld-ekwiteitsverhouding het van 2,9:1 (2010) tot 1,8:1 verbeter. Die maatskappy beoog om sy skuldlas binne die volgende paar maande selfs verder te delg.
Die maatskappy het ook die afgelope jaar rekordverkope van trekkers beleef. In Suid-Afrika het hy 354 trekkers verkoop, terwyl daar 159 elders in Afrika verkoop is. Dit is die eerste keer dat Afgri se buitekantore trekkers verkoop.
Mnr. Chris Venter, uitvoerende hoof van Afgri, sê die maatskappy se silo’s het die jaar met lae mielievolumes afgeskop. Dít tesame met die feit dat boere mielies gemiddeld vir drie maande opgeberg het, het die maatskappy se opbergingsinkomste verlaag.
Mielies word gewoonlik vir vier maande opgeberg, maar ’n gunstige mielieprys het boere genoop om vinniger te verkoop. Dié kombinasie van faktore het Afgri uiteindelik ’n geraamde verlies van R48 miljoen laat ly.
Die pluimveebesigheid het nie na wense gepresteer nie. Venter sê die besigheid was in die verlede te klein om lewensvatbaar te wees en die hoenderras wat tot op hede gebruik is, het nie ’n doeltreffende voeromsetting gehad nie. Die maatskappy beoog om dié deel van sy besigheid uit te brei.
Venter verwag dat boere ’n goeie oes sal lewer en dat die tweede helfte van die jaar nie weer die skrikwekkende resultate van 2010 se tweede helfte sal oplewer nie.
1 Maart 2012
