Sekere boere het dit reggekry om hulle met termynkontrakte teen die afgelope seisoen se geweldige daling in mieliepryse te verskans, sê mnr. Chris Sturgess, hoof van die JSE se kommoditeitsmark vir afgeleide instrumente.
“Van Januarie tot Februarie was daar byvoorbeeld kans om teen ’n prys van R1000/t hoër as wat hy vandag is, te verskans,” het Sturgess op die Nampo-Oesdag aan Landbouweekblad gesê.
Dít volg op kritiek dat Safex deur ’n paar groot spelers gemanipuleer word, en dat dit die afgelope seisoen, met sy laat reën, haas onmoontlik vir individuele produsente was om hulself met termynkontrakte teen die prysval te beskerm.
Rekord-hoogtepunt
Die witmielieprys het die afgelope jaar en ’n half vanaf ’n rekord-hoogtepunt van meer as R5200/t teen einde 2015 tot die heersende vlak van rondom R1700/t geval.
Sturgess sê die belangrikste is om nou vorentoe te kyk. Markspelers moet gierigheid en vrees opsy skuif, en produsente moet elke seisoen bereid wees om minstens ’n deel van hul oes te verskans. Verpligte en onmiddellike openbaarmaking van in- en uitvoere is ’n belangrike kwessie, sê hy.
Graan SA vra al vir jare vir wetlike regulasies wat bepaal dat in- en uitvoerkontrakte onmiddellik bekend gemaak word, en nie eers as die invoer-mielies in ’n plaaslike hawe land nie.
Doeltreffender mark
“Ons steun openbaarmaking van enige inligting wat die mark doeltreffender kan laat funksioneer,” sê Sturgess.
Hy voeg by daar is bepaalde logistieke uitdagings. Dis baie belangrik dat dié inligting onafhanklik ingesamel word. Die proses moet duidelik en deursigtig wees, en dié wat inligting insamel, moet geen regstreekse belang in verhandeling op die mark hê nie.
Intussen is alle oë op die uitvoer- mark, wat in die afsienbare toekoms die koers van die mielieprys gaan bepaal.
? Lees ook: Bielie-mielie-oes oortref all rekords
