Gevalle van miltsiekte onder wild is in die Maruleng munisipale distrik, wat Hoedspruit en Tzaneen insluit, in Limpopo bespeur, sê die provinsiale departement van landbou.
Luidens ‘n berig op News24.com doen die Regering ‘n beroep op landelike gemeenskappe om nie die vleis van diere wat gevrek het, te eet nie.
Mnr. Kenny Mathivha, woordvoerder vir die departement, rig ook ‘n versoek aan opkomende boere om hul diere te neem om gratis ingeënt te word. Kommersiële boere sal egter hul diere op hul eie onkoste moet laat ent. Die siekte versprei na mense wanneer hulle in kontak kom met besmette karkasse.
Waarskuwings geruime tyd uit
Intussen sê mnr. Francois van der Berg, voorsitter van Agri Limpopo, waarskuwings in dié verband is reeds ‘n geruime tyd gelede gemaak, en van die boere het hul diere reeds begin ent. “Die gevalle waarvan ons bewus is, en ek weet van spesifiek twee, is egter nie krities van aard nie, so dit is op ‘n baie klein skaal.”
Mnr. Ben Marias, voorsitter van die TLU SA, sê hy is nog nie bewus van waarskuwings of probleme wat aangemeld is nie, maar hy is seker boere tree tans in hul eie beste belang op.
22 Oktober 2010
