“Moenie elke keer as daar oor onsuksesvolle grondhervorming gepraat word, die vinger na boere wys nie,” sê mnr. Faan van Zyl, ‘n graanboer van Makwassie in Noordwes.
Van Zyl het dié versoek by Agri SA se jaarkongres in Muldersdrift aan mnr. Gugile Nkwinti, Minister van Landelike Ontwikkeling en Grondhervorming, gerig.
Van Zyl het voorgestel dat die hele proses van grondhervorming soos die Wêreldbeker-Sokkertoernooi, wat ‘n vennootskap tussen die private sektor en die Regering was, bestuur moet word. Hy meen die toernooi was só suksesvol “omdat dit so gewild is en die geld daarvoor beskikbaar gemaak is.”
Water en elektrisiteit
Nkwinti het teenoor die kongres erken dat sy departement se institusionele vermoë tekort skiet om die proses deur te voer. “ ’n Groot gaping bestaan tussen dit wat institusioneel gedoen moet word, en dit wat regtig op grondvlak plaasvind. Pres. Jacob Zuma het erken dat die proses te stadig plaasvind, en dis hoekom die uitkoms-gebaseerde Regeringsbenadering toegepas word.
“Ons weet ook dat die Regering nie voldoende opgevolg het nadat grond aan eisers oorhandig is nie, en die nodig ondersteuning is ook nie aan hulle gebied nie,” het Nkwinti opgemerk.
(Lees ook: Meer as 100 plase in Vrystaat vou - Red.)
Hy het bygevoeg dat ondanks die institutionele uitdagings wat die stelsel in die gesig staar, water en krag van die grootste uitdagings vir grondhervorming is.
Groenskrif
Die Minister sê hulle besef dat dieGroenskrif tans vir die bedryf probleme veroorsaak omdat dit nog nie ter tafel gelê is nie. Hy sê daar is egter baie rolspelers wat die dokument onder oë moet kry en veral die aankoop van die grond is nog “a sticky issue”.
Dié beleid is volgens Nkwinti saamgestel omdat die huidige beleid oor grondhervorming nie suksesvol is nie, en die Regering ‘n nuwe beleid in dié verband wil saamstel.
Hy het die georganiseerde landbou gevra vir sy insette oor die vasstel van grondpryse en die moontlikheid van die daarstel van ‘n Kamer van Grondwaardes, wat grondpryse sal bepaal.
Nkwinti het gevra vir geduld ten opsigte van die saamstel van die beleid.
7 Oktober 2010
