Sy gaan nie arms gevou sit en toekyk dat die mense van die Wes-Kaap ly omdat daar nie geld in die Departement van Water en Sanitasie se begroting is om hulle te hulp te snel nie.
Dít is die boodskap wat me. Nomvula Mokonyane, Minister van Water en Sanitasie, aan die Parlement se portefeuljekomitee vir water en sanitasie oorgedra het. Mokonyane word voortdurend oor die kole gehaal oor oormatige bestedings, hoewel die departement se teikens nie bereik word nie.
Me. Tarnia Baker, DA-LP, het die departement by ’n komiteevergadering aangevat omdat hy veronderstel is om meer met minder ver vermag, maar hy doen minder met meer.
Oor begroting
Die departement se begroting is met R18 miljoen oorbestee, maar slegs 47% van sy teikens is bereik.
Die vlymskerp Mokonyane het gou uitgewys dat hulle 47% van hulle teikens bereik het in ’n hoogs uitdagende tyd.
“Ons het ’n droogte gehad en hiermee kan nie goedkoop politiek gespeel word nie. ’n Ernstige uitdaging staar ons ook nou in die Wes-Kaap in die gesig.”
Die departement het meer as R200 miljoen nodig om die situasie in die provinsie te hanteer.
“Moet ek my arms vou, want ek moet sommige van die hulpbronne herprioritiseer?” het sy aan die komitee gevra.
Sy het verwys na die noodbouwerk wat in die Theewaterskloofdam gedoen moet word om van die laaste oorblywende water met ’n kanaal na die pomptoring te herlei.
Die wal en ’n kanaal sal gebou word om water van die een kant van die dam onderdeur die brug van die R321-pad tussen Grabouw en Villiersdorp na die pomptoring te laat vloei. “Daar is nie hiervoor beplan nie. Wat sou julle doen?”
Dankbaar
Sy het gesê die komitee moet eerder as om vas te kyk aan die teikens wat nie in die moeilike tyd bereik is, dankbaar wees dat daar nie in die drie jaar van erge droogte baie mense omgekom het van siektes wat deur besoedelde water oorgedra word nie.
Daar was verliese van vee, maar met die hulp van die Departemente van Landelike Ontwikkeling en Landbou, Bosbou en Visserye, is daar saamgewerk om baie diere te red.
Die swak winterreën bied nou ’n verdere uitdaging vir die Wes-Kaap. “Ons gaan nie dat die mense van die Wes-Kaap swaarkry nie, alhoewel daar nie nuwe geld by die begroting gaan bykom nie.
“Ons sal moet kyk wat daar is en ingryp.”
Sy het benadruk dat wat die Wes-Kaap deurmaak ’n probleem vir die hele land is en dat die boere en die gemeenskappe in die provinsie alle hulp moontlik moet kry.
