Samewerking tussen Mosambiek en Suid-Afrika op landbougebied hou voordele vir al twee lande in, sê dr. Pieter Mulder, adjunkminister van Landbou, Bosbou en Visserye.
Luidens ‘n verklaring het Mulder oor die naweek met mnr. Antonio Raul Limbau, Mosambiek se adjunkminister van Landbou, in Maputo vergader.
Mulder sê dié gesprek was sinvol en verskeie landbouprojekte wat tussen die twee lande bestaan, is bespreek. Dié projekte sluit in ‘n besproeiingskema in Sussundenga, genetiese verbetering van dié land se veekudde en ‘n beplande suiwel-aanleg.
Suid-Afrikaanse boere
Die plek en bydrae van Suid-Afrikaanse kommersiële boere in Mosambiek is ook bespreek. Tot dusver het sowat 800 Suid-Afrikaanse kommersiële boere reeds hulle boerderybedrywighede ná dié land uitgebrei, of daarheen verhuis om daar te boer.
Limbau het groot waardering uitgespreek vir die groot rol wat dié boere in Mosambiek speel. Dít sluit in die opleiding van plaaslike boere en verskeie suksesvolle vennootskappe wat tussen Suid-Afrikaanse en Mosambiekse boere aangegaan is.
Werksgeleenthede
Volgens Mulder is hulle dankbaar vir die werksgeleenthede wat Suid-Afrikaanse boere in Mosambiek skep. Hy meen dat dit verskeie probleme in al twee lande kan oplos.
“Deur meer werkgeleenthede in Mosambiek te skep, word Mosambiekse werkers op ’n natuurlike manier uit Suid-Afrika teruggetrek na Mosambiek. Dit verseker groter voedsel- en ekonomiese stabiliteit in Suidelike Afrika en verlig terselfdertyd Suid-Afrika se onwettige immigrante-probleem. Dit bied ook onmiddellike uitbreidingsmoontlikhede vir Suid-Afrikaanse boere, wat vanweë politieke inmenging nie altyd meer in Suid-Afrika moontlik is nie,” aldus Mulder.
19 Desember 2011
