’n Video van drie boerseuns van Kansas in Amerika wat ’n bekende rapliedjie nagemaak het, het wêreldwyd vir opslae gesorg met die video wat al sowat 5 miljoen keer gekyk is. Die video is gegrond op die lied “I’m sexy and I Know it” deur LMFAO.
Luidens ’n berig in die Los Angeles Times is die 21-jarige mnr. Greg Peterson en sy twee broers, Nathan en Kendal, in die video te sien. Peterson is ’n student aan die Universiteit van Kansas. Die hele gesin is by die projek betrek met Peterson se 12-jarige suster, Laura, wat gehelp het deur video’s te skiet waar die drie broers op trekkers ry of vee voer.
Die video word glo deur die landboubedryf in Amerika verwelkom aangesien dit tans die aandag van ’n debat oor ’n omstrede wetsontwerp vir die landbou afgetrek het.
Inlig
Volgens ’n blog, Our Country, wat op Yahoo Music verskyn, het Peterson die idee vir die video gekry terwyl hy eendag saam met van sy vriende gekuier het.
Dié blog beskryf die video as ’n “opvoedkundige video vir al die stadsjapies daarbuite oor wat die landboubedryf behels.”
Peterson sê hy het nog nooit van die liedjie gehou nie, en dit eintlik irriterend gevind, maar hoe meer hy daarna geluister het, hoe meer potensiaal het hy daarin raakgesien.
“Ek het net gedink dit is snaaks, ons het nie eintlik ’n visie daarvoor gehad nie. Maar ná die video beslag begin kry het, het ons regtig begin druk uitoefen om dit as voorspraak (vir die bedryf) te begin gebruik. Mense moet weet waar hul kos vandaan kom. Mense moet weet wie boere is. Ons is nie slegte mense nie,” vertel Peterson.
Bronne: Los Angeles Times en Our Country
