Die laaste deel van die plaas Moabsvelden van oud-landbouminister Hendrik Schoeman is aan ‘n steenkoolmaatskappy verkoop weens die skade wat mynbou daarop veroorsaak.
Die nuwe eienaar van dié gesogte plaas in die distrik Delmas is Exxaro Coal (Edms.) Bpk.
Volgens mnr. Kallie Schoeman, besturende direkteur van die boerdery Hendrik Schoeman & Seuns, is dié laaste deel van Moabsvelden aan die maatskappy verkoop nadat daar reeds vir 10 jaar lank op die plaas gemyn en geprospekteer is.
“Ons het die laaste deel van die plaas verkoop, want weens die skiet van dinamiet en die geboor het van ons geboue oor die jare begin kraak, en boorgate val toe. ‘n Geyser het ook al uit ‘n muur geval weens die vibrasies van die dinamiet wat geskiet word,” vertel Schoeman.
Boer 41 jaar op die plaas
Schoeman sê die familie het die plaas in die laat sestigerjare gekoop, en hulle boer die afgelope 41 jaar daarop. Hy sê hulle gaan wel nog van die grond by die maatskappy terughuur om daarop te boer, maar oor ‘n paar jaar sal niks meer op die plaas geplant kan word nie. Hulle verbou tans mielies, sojabone en klein wit inmaakboontjies op Moabsvelden.
Schoeman sê landbougrond word tans deur mynbedrywighede in dié gebied bedreig. Meer en meer mynmaatskappye spits hulle glo op dié gebied toe weens die Kusile-kragstasie wat gebou word en vir steenkool-uitvoere. “As daardie kragstasie klaar gebou is, gaan hulle steenkool nodig hê, en so gaan al hoe meer kosbare landbougrond verlore.”
Volgens Schoeman is die familie wel van plan om die mynbou-aktiwiteite met ‘n valkoog dop te hou. “Ons wil seker maak dat die nodige rehabilitasie van die grond en die omgewing, soos wat dit in wetgewing vervat is, wel uitgevoer word.”
In die plaasverkope-afdeling in Landbouweekblad van 17 Januarie 2012 word aangedui dat 273 ha van die plaas vir R9 598 541 aan Exxaro verkoop is.
17 Februarie 2012
