Só het mnr. Bertus van Heerden, hoofekonoom van die Melkprodusente-organisasie (MPO), by die Landbouskool Oakdale op die jaarvergadering van die Wes-Kaapse MPO gesê.
Verbruikers raak welvarender. Die stellings dat suiwel te duur is en verbruikers nie geld het nie, hou nie water nie. Wat gebeur, is dat meer “suiwelprodukte” nou verkoop word met minder melk wat geproduseer word. Dit is weens die nagebootste suiwelprodukte – dairy snacks – wat baie min indien enige melk bevat.
“Die afgelope paar dekades het nagemaakte suiwelprodukte, wat nie voldoen aan die kriteria dat dit vanaf ’n dier wat gemelk word afkomstig is nie, sonder veel moeite die mark betree.”
Terselfdertyd het produkte op die plaaslike mark gekom waarin die gedeelte wat melk sou bevat, vervang is met nagemaakte produkte. Van die produkte geniet goeie rakvoordele tot nadeel van egte suiwelprodukte.
Waar was die hekwagte?
“Dit is die MPO se mening dat hierdie produkte ’n belangrike rol speel in die stagnasie na die vraag na melk in die land. Êrens het die ‘hekwagte’ wat moes toesien dat dit nie gebeur het nie, ‘die hek oopgelaat’,” het Van Heerden gesê.
Mnr. Hannes Nel, voorsitter van die Wes-Kaap MPO, gesê dit word verwag dat die produsenteprys van melk in 2023 waarskynlik behoort te styg. “Die bedryf moet saamstaan en druk op die regering uitoefen om ’n gunstige klimaat te skep om die speelveld gelyk te maak.” Die Wes-Kaap produseer 30,6% van die land se melk.
Hoewel ’n moeilike jaar agter die rug is vir die melkbedryf weens covid-19, swak ekonomiese groei, onsekerhede in die wêreld, beurtkrag en nog faktore, het Nel die versekering gegee dat “winkelrakke nie sal leeg raak van melk nie”.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
