Namibië se melkbedryf kan baie krimp as ’n nuwe regulerende beleidsraamwerk nie binnekort die lig sien nie, sê die Suiwelprodusenteverenging (SPV) in Namibië.
Luidens ’n verklaring is melkboere in dié land moedeloos oor gesubsidieerde ingevoerde produkte wat in die mark gestort word.
Die organisasie sê wat die Suid-Afrikaanse mark betref, is die speelveld tans ook nie gelyk nie. Namibië is die enigste land binne die Suid-Afrikaanse Doeane-gebied waarvan die suiwelbedryf ten volle gedereguleer is. Geen handelsbeperkings bestaan tussen die twee lande nie.
“Namibië se suiwelvolumes is minder as 1% van die totale suiwelmark van die twee lande en dit is dus hoogs vatbaar vir enige markafwykings in Suid-Afrika,” aldus die vereniging. Die SPV sê die land se bedryf word nie beskerm teen die dominante Suid-Afrikaanse mark en die goedkoop gesubsidieerde suiwelinvoer van buite die doeane-gebied nie.
Hormone
Volgens die SPV is die Namibiese suiwelbedryf minder produktief en koste-effektief as sy Suid-Afrikaanse eweknie, maar dit is nie weens die land se onvermoë om mee te ding nie.
Dié ongelykhede word daaraan toegeskryf dat Suid-Afrikaanse boere toegelaat word om sekere voedingsaanvullings, hormone, en inentings te gebruik wat koeie se produksie verbeter.
Verder meen die land Suid-Afrikaanse boere se produksiekoste is laer omdat hulle toegelaat word om geneties gemodifiseerde gewasse te gebruik.
Die organisasie dring derhalwe daarop aan dat die beleid ook die invoer van enige suiwel wat nie hormoonvry of sonder voedingsaanvullings of antibiotika geproduseer is nie, moet verbied. “Dit sal gelyke handelstoestande verseker en Nambiese verbruikers die voordeel gee om hormoonvrye melk en suiwelprodukte te alle tye beskikbaar te hê,” lui die verklaring.
8 Februarie 2012
