Te
midde van voortdurende onsekerheid onder die heersende nasionale ramptoestand,
en talle gesprekke daaroor op Graan SA se jaarlikse kongres vandeesweek, is
gister op die kongres ten gunste van die aanbied van die Nampo-oesdag gestem,
met die nakoming van enige nasionale regulasies wat geldig kan wees.
Ná twee jaar sonder Nampo sal die Nampo-oesdag vanjaar van 16 tot 20 Mei aangebied word. Ja, jy’t reg gelees, dis vanjaar vyf dae en nie die tradisionele vier nie. Graan SA het dit vroeër vandag aan alle uitstallers en in ’n verklaring bevestig.
Die span van Graan SA het op die organisasie se kongres aan Landbou.com gesê hoewel die organisasie wag op terugvoer van die nasionale korona-bevelsraad oor sy aansoek om die Nampo-oesdag vanjaar te kan aanbied, gaan die span volstoom voort met reëlings.
Uitstallers het tydens die kongres gesê dat hulle gereed is om aan hul stalletjies te werk en sommige boere het geskerts dat hulle en hul gesinne so graag Nampo wil hou dat hulle in Mei by die terrein sal opdaag en op hul eie Nampo sou hou as dit moet.
“Die uitwerking om sedert 2019 nie die Oesdag op Nampopark te kon aanbied nie, het verreikende gevolge nie net vir die organisasie gehad nie, maar ook vir die omliggende dorpe. Die plaaslike distrik, wat nog nie heeltemal van die buitensporige waterskade in Januarie herstel het nie, maak staat op die ekonomiese en finansiële inspuiting wat die Oesdag meebring,” sê dr. Dirk Strydom, Graan SA se hoof van bemarking, Nampo en navorsing, luidens die verklaring.
In oorleg met uitstallers het meer as 80% aangedui dat dit nodig is om die Oesdag in Mei 2022 aan te bied, en hulle was dit eens dat ’n ekstra dag in die skedule broodnodige sakegeleenthede kan byvoeg. “Met byna 800 uitstallers is Nampo dié platform om met die landboubedryf se topbelanghebbendes te netwerk, vriendskappe en verhoudings te versterk en te geniet wat hierdie unieke vertoning bied in ’n rustige plaas-atmosfeer,” lui die verklaring.
Volgens mnr. Danie Minnaar, voorsitter van die Nampo-oesdag, is die beste tegnologie en kennis vir produsente om volhoubaar te boer by Nampo te vinde. “Al bly die landbou onder aansienlike druk, het boere steeds genoeg geesdrif vir boerdery om elke aspek van die landbou wat die Oesdag bied, te verken om mededingend en relevant te bly.”
Die afwesigheid van die Oesdag het die belangrike rol wat dit speel om netwerkvorming in die landbousektor moontlik te maak, beklemtoon. “Om regeringsverteenwoordigers en belanghebbendes uit die landbouwaardeketting te ontvang, bied geleentheid vir belangrike en soms moeilike gesprekke in ’n omgewing wat bevorderlik is vir en gemik is op die bevordering van die sektor plaaslik en regdeur Afrika suid van die Sahara,” sê dr. Pieter Taljaard, Graan SA se uitvoerende hoof.
Graan SA sê hy sit nou volstoom skouer aan die wiel met beplanning, en besonderhede rakende kaartjieverkope en toegangstye sal mettertyd bekend gemaak word.
