Die skou-enjins van Graan SA se Nampo-Oesdag is op vol sterkte. Die eerste dag is gekenmerk deur uitstekende weer en goeie verkeersvloei.
Op Nampo Park – waar die Oesdag duur tot Vrydag, 18 Mei – heers ? atmosfeer wat spreek van die gees van die landbou. “Die gemoedelikheid van besoekers is opvallend,” het mnr. Cobus van Coller, voorsitter van die Oesdagkomitee, gesê.
“Dinsdag het vol verwagting afgeskop en die terugvoer van besoekers én uitstallers is gunstig oor die toestand van die terrein, maar ook oor die verwagting van vanjaar se Oesdag. Aanduidings is dat die weer ook vir die res van die week gaan saamspeel,” het hy gesê.
Groot belangstelling in die Oesdag
Volgens mnr. Jannie de Villiers, Graan SA se uitvoerende hoofbestuurder, toon landbou-rolspelers uit die buiteland en veral Suidelike Afrika ? toenemende belangstelling in die platform wat die Oesdag bied. Uitstallers maak ook ? punt daarvan om hul moedermaatskappy of vennote daarheen te nooi omdat die Oesdag gereken word as ? besigheidsplatform en netwerkpunt om uiteindelik ? kanaal na Afrika te skep.
Lande uit die SADC-streek besef eweneens die waarde van dié handelstentoonstelling en georganiseerde besoekersgroepe uit Zambië, Mosambiek, Malawi, Zimbabwe en Botswana word by vanjaar se Oesdag verwag.
Graan SA spog vir die eerste keer met ? eie radiostasie wat gedurende die Oesdag op die frekwensie 90.9 FM uitsaai. Dit word gedryf deur OFM Stereo en is, sover bekend, die eerste gefokusde landbou-radiostasie in sentraal Suid-Afrika. Die program-inhoud bestaan uit onderhoude met uitstallers en landboukundiges oor verskeie aspekte van die landbou. Besoekers aan die Oesdag kan in ? radius om Nampo Park hierop inskakel vir verkeer- en weerverslae en nuus oor die Oesdag.
Kaartjies kan vooraf gekoop word by Engen-diensstasies, Senwes Village-winkels of by Nampo Park self. Die hekke open om 08:00 en sluit teen 17:00.
15 Mei 2012
