Die nasionale Departement van Landbou, Bosbou en Vissery het tot dusver slegs R12 miljoen se droogtehulp aan Wes-Kaapse boere toegeken, dít te midde van 'n droogte wat lank reeds krisispunt bereik het.
Dié bedrag is volgens mnr. Alan Winde, Wes-Kaapse minister van ekonomiese geleenthede, gebruik om veevoer aan te koop.
Hulp
Die Wes-Kaapse departement van landbou het die laaste jaar 'n verdere R73 miljoen hulp toegeken, terwyl die provinsie ook as ‘n rampgebied verklaar is.
“Ons het 'n deel van ons begroting hertoegewys om boere te ondersteun en meer as 105 ton veevoer aangekoop. Ons verwag egter 'n tekort van R96 miljoen wat hulp aan boere vir sowat vyf maande sal dek. Die behoefte aan droogtehulp sal ook in die volgende weke toeneem.”
Volgens Winde is 'n versoek aan die provinsiale tesourie gerig om R5,8 miljoen uit die vorige finansiële jaar se begroting vir droogtehulp te gebruik.
Watervoorsiening
'n Deel van die bedrag sal gebruik word om aan die rivierkanaalsisteem te werk wat water na die Voëlvleidam voer om sodoende beter opvangs van reën te verseker.
Volgens Winde is sy departement ook in die proses om saam met die Departement van Water en Sanitasie verbeterings aan die voerkanaal van die Brandvleidam aan te bring.
Die verbetering sal besproeingswater vir sowat 4 400ha voorsien en 8 000 werksgeleenthede skep.
