Suid-Afrika se somerreëngebied kan in die laaste helfte van die somer ook natter as normaalweg wees.
Volgens die SA Weerdiens se jongste vooruitskatting vir die seisoen is die meeste plaaslike en internasionale voorspellingsmodelle dit hieroor eens, hoewel die akkuraatheid van die voorspelling volgens die wiskundige modelle aan die lae kant is.
Warmer as normale temperature word ook vir die hele land voorspel, hoewel ook met ’n redelik lae graad van sekerheid.
Dít kom terwyl die groot vraag op almal se lippe is of Suid-Afrika se somerreënstreke te midde van milde neerslae op die vooraand van ’n nat siklus is, of nog onder die heersende droogtesiklus sal moet vasbyt. Historiese statistieke wys dat hierdie siklusse tradisioneel tussen drie en sewe jaar duur.
Ondergemiddelde reënval in sentrale en westelike dele
Die Weerdiens sê hoewel die knellende droogte gedeeltelik oor die oostelike en noordoostelike dele van die land verlig is, ervaar die sentrale en westelike dele van die land steeds ondergemiddelde reënval.
“Die publiek word gewaarsku dat, met die winter wat op pad is, betekenisvolle waterverlies verwag kan word weens die gebruiklike afname in reënval, saam met hoë verdamping, veral oor die somerreënstreke.
“Waterbesparingsmaatreëls is dus steeds hoogs vir die hele land aan te beveel,” lui die verslag.
Dit bevestig dat die afgelope swak La Niña verkas het om vir ’n neutrale fase, tussen La Niña en El Niño, plek te maak. Hierdie neutrale toestand maak dit baie moeilik om akkurate reënval- en temperatuur-vooruitskouings te maak.
