Die Nasionale Beplanningskommissie (NBK) het in sy ontwikkelingsplan sy steun vir die prospektering vir skaliegas in die Karoo uitgespreek.
Luidens ’n berig op TimesLive sê die kommissie Suid-Afrika moet hidroliese breking vir skaliegas, toelaat.
“As gasreserwes bewys en die omgewingskwessies bygelê kan word, sal die ontwikkeling van dié hulpbronne en gas-na-krag-projekte bespoedig word,” aldus die ontwikkelingsplan.
Die kommissie sê verder dat die opvang van metaangas in steenkoollae, skaliegas-ontginning in die Karoo en die invoer van vloeibare gas vir alternatiewe kragopwekking, oorweeg moet word.
Die kommissie sê volgens die Amerikaanse administrasie vir Energie-inligting het Suid-Afrika op vier na die grootste reserwe van skaliegasbronne wêreldwyd, en dít kan ’n groot deel van die land se kragprobleme oplos.
Voortydig
Intussen sê die Treasure the Karoo Aksiegroep (TKAG) die kommissie se uitsprake is voortydig, veral teen die agtergrond van die gebrek aan inligting oor die taakspan wat hidroliese breking en die uitwerking daarvan op die Karoo moet ondersoek.
“As die moratorium op hidroliese breking in ag geneem word, is dit duidelik dat Suid-Afrika nie kan bekostig om oorhaastig op te tree met die begin van skaliegas-mynaktiwiteite in die land nie,” sê mnr. Jonathan Deal, voorsitter.
Ná die TKAG regstappe gedoen het om me. Susan Shabangu, Minister van Energie, en haar departement te dwing om inligting oor die taakspan aan die publiek bekend te maak, het die departement aangedui dat hy die aansoek gaan teenstaan.
Deal sê hulle is oortuig dat die verkeerde inligting oor die grootte van die land se gashulpbronne aan die kommissie verskaf is. Hy sê selfs in Pennysilvanië, Amerika, waar hidroliese breking reeds plaasvind, is die aanvanklike bepaling van gasvoorrade met 80% verminder.
Wat ander metodes vir die opwekking van krag betref, sê Deal hulle meen verskeie ander opsies bestaan en moet deeglik ondersoek word.
Bron: Timeslive
14 November 2011
